Nos konosé nos klientenan, i nan konosé nos.
NOS PROPÓSITO
Na 1974 a funda Botica Cerrito; un di e promé botikanan na Kòrsou. For di inisio nos fundeshi ta ku nos ta un negoshi orguyoso di ta fundá pa un famia lokal. Na Kòrsou nos ta yama negoshinan ku ta bende remedi i produktonan pa kuido personal bou di un dak, un ‘Botica’ òf ‘Botika’. For di 1974, Botica Cerrito ta renombrá i konfiá den nos komunidat. Ku e propósito pa trese nos servisionan mas serka di nos klientenan, nos a ekspandé e Botika ku tres filial, ku ta situá na areanan sentral riba nos isla; Semper nos ta serka di bo! E otro dos filialnan ta Botica Groot Piscadera i Botica Novo. Tur tres filial ta posishoná na kayanan sentral riba nos isla, ku parada di transporte públiko dilanti porta.
Ya pa algun dékada Fundashon di Konsumidó a klasifiká nos botikanan den e Top 3 di e botikanan mihó surtí ku e mihó preis na Kòrsou. Esaki ta duna nos klientenan e konfiansa i trankilidat di por hasi nan kompras seka nos, ku e siguransa ku nan ta haña balor pa nan sèn.
Nos konosé nos klientenan i nan konosé nos. Nos ta apresiá e konfiansa ku nos klientenan ta duna nos ora nan skohe pa bishitá un di nos filialnan. Nos ke kumpli ku e konfiansa ku nan ta otorgá, dor di perkurá ku tur e produktonan preferí di nos klientenan ta bon di stòk. Esaki ta konta pa produktonan ku ya pa dékada ta konta komo produkto preferí, pero tambe produktonan ku aktualmente ta popular i na moda.
Tur nos tres Botikanan ta miembro aktivo di Asosashon di Botikario i Doño di Botika (V.A.E. – De Vereniging van apothekers en eigenaren). Komo miembro aktivo di e asosashon nos afan ta pa kontribuí na bienestar di nos sistema di salubridat en general.
No opstante ku nos ta tres filial separá geográfikamente riba nos isla, realmente nos ta traha komo un tim uní. Mayoria di nos empleadonan ta laborá serka nos pa hopi aña kaba, i konosé nos komunidat manera niun otro. Dor ku nos konosé nos klientenan, nos por ofresé e atenshon personal adekuá òf e espasio apropiá, segun e nesesidat di e kliente.
Tur tres filial tin un Botikario ku ta registrá komo tal na Ministerio di Salubridat di Kòrsou, i ku ta responsabel pa e area relatá na remedi. Ademas, un tremendo tim di Asistente Botikario ta sostené e Botika.
Nos ta balorá kada kliente, ya ku nos ta konsiente ku nan ta liber pa skohe kua botika nan ke bai.
Nos ta para pa produktonan di kalidat haltu, pues nos ta skohe hopi konsiente kua produkto nos ta ofresé den nos botikanan.
Pa nos ta importante ku e kliente tin amplio eskoho. P’esei nos ta perkurá pa nos botikanan tin un surtido grandi di produkto i un gran variedat di marka na stòk, pa nos klientenan por skohe nan produkto preferí.
Pa nos ta importante ku kada kliente ta haña balor pa su sèn. P’esei nos ta hasi nos gran esfuerso pa ofresé nos klientenan e mihó preis tur ora!
Nos ta balorá tradishon, pues bo por konta ku nos lo tin tur Welita su produktonan tradishonal i preferí na nos botikanan.
Nos ta balorá desaroyo, pues kontinuamente nos ta ofresé produktonan popular òf ku ta na moda, speshalmente den nos area di makiyahe.
Nos ta balorá bo tempu, pues nos lo hasi nos gran esfuerso pa yuda bo ku rapides.
I finalmente, nos ta balorá nos tim, pasobra nan ta hasi nan gran esfuerso pa huntu nos ofresé bo e mihó servisio.
Botika na Warda
